2026年5月9日，維港口腔參加咗由莒光文化慈善基金舉辦嘅「母親節心意卡設計大賽」。喺活動當中，小朋友以母親節為主題，親自設計同繪畫各式各樣嘅心意卡，向媽媽送上溫馨嘅節日祝福。

比賽期間，每位小朋友都落足心機，認真思考、用心繪畫，創作出多款別出心裁嘅心意卡。其中有一位小朋友設計咗一張書信形式嘅心意卡，字裡行間流露對媽媽嘅深情祝福，感恩媽媽多年嚟嘅付出，場面令人動容。

維港口腔嘅鄭學長亦親身參與今次大賽，仲特別參考近期嘅熱門電影，設計咗一幅名為「給阿嫲的情書」嘅心意卡，向長輩表達敬意。適逢母親節將至，鄭學長藉住呢個機會，祝願天下嘅媽媽，以及爸爸嘅媽媽，都「母親節快樂」，希望佢哋平平安安、生活順順利利。

此外，鄭學長仲特意準備咗禮物送畀每一位參賽嘅小朋友，鼓勵佢哋繼續努力學習，孝順父母，場面溫馨又感人。